١١ يوليو، الساعة ٣:٠٧ م
قصة راقت لي
منقول
اكو وحدة متزوجة بس حبابة حيييل ساكنة شقة ابعمارة
( يعني من مثيرات الجدل عله گولة المثقفين )
وكل يوم من يطلع رجلها لشغله يصعدلها واحد شكل شي زغار وشي اكبار من كل الأنواع والتوجهات
( يعني صايرة وحدة وطنية عله گولة المستقلين )
بحيث الناس الساكنة بالعمارة ملوا ولعبت نفسهم من الشكولات اللي تدخل العمارة عله هاي الحبابة الصايرة ابعمارتهم ملتقى جماهيري
( يعني توافقية وطنية عله گولة الحزبيين )
وبيوم من الايام گلولها كافي ترى راح انفضحج
( يعني ايلوحون ابملفات الفساد عله گولة البرلمانيين )
بس ماكو فايدة لما دزولها خبر انه قررنا نجتمع بالليل ونجي نگول لرجلج ترى واحد صاعد واحد نازل
(يعني يضربون بيد من حديد عله گولة المصلحين ) ؟
المهم منعولة الوالدين خافت وگالت خل الگالي فره زينه للسالفة
(يعني غطاء دستوري عله گولة المشرعين )
واشتغل تفكير بت ابليس وجابت موس حلاقة وطيرت نص من حاجبها !
ومن اجه رجلها گامت تبجي وتدگ وتلطم
فسالها رجلها : گللها هاا شبيج حبيبتي شكو .. اشصاير .. دفهميني ؟
گلتله : جاي اعدل بحواجبي وگصيت حاجبي وجوارينا كلهم يضحكون عليه ويصيحون وراي ( واحد صاعد واحد نازل)
( يعني تسقيط سياسي عله گولة الاعلاميين )
هذا هم المعدل صعدت الغيرة براسه ونطت دمارات المرجله ابجسمه وغلا عرق الناموس فلگف ساطور اللحم وطلع بنص العمارة يصيح : مناعيل الوالدين مرتي واحبها ( واحد صاعد واحد نازل ) انتوا شعليكم .. معليكم بيها والي يندك بيها النوب اسوي ما اسوي بي وارجعه لل ..
(ارجعه للمربع الاول .. عله گولة السياسيين)
الناس هم سمعت وكلمن غلس وسد بابه وطب جوه لان مثل متعرفون طلايب وعطاوي وفصول وشكاوي وقط ابمختلف انواعه لهذا قرر الجميع السكوت حقنا للدماء ودعما لرصانة الوحدة الاجتماعية
( يعني حفاظا على التجربة الديمقراطية عله گولة الديمقراطيين )
” شاهد سالفتي أيها الاحبة الكرام : اكو هواي ناس مثل هاي الحبابة مطيحة حظ الوادم وملبستهم الطاسة بس خبيثة وتعرف اشلون تقشمرهم وتضحك عليهم
( يعني عدها مقبولية عله گولة الفاسدين )
والمصيبة الأكبر انو اكو هواي مثل صاحبنا رجل الحبابة ماكولين من الفج للفج ومغلسين وراضين ومطمبخين ويدافعون عنها ويعتبرونها فضل من الله منزله عليهم (يعني تاج الراس عله گولة المنبطحين ) لا او واحدهم من اتگله بوية ترة انهجمت ابيوتنه.. يزعل عليك ويمتعض ويوجهلك خطاب شديد اللهجة بعدم المساس بالرموز يعني ( ايفرها عالمشتكي عله گولة اخوتنه القانونيين ) وهاي الوادم ظاله بالنص اتفر ابروسها ماتدري شنهي الفلم يعني ( طرشان ابزفه عله گولة اهلنة الطيبين ) “
